L’alp da Sagogn entamez il territori da skis da Laax

La collavuraziun tranter la vischnanca da Sagogn e las pendicularas da Laax saja buna, di Gion Beeli. El è in da quels che sto savair quai. Dapi 27 onns è Beeli numnadamain guardiachamona sin l’alp Son Martin, dapi 31 onns è el però er scolast da skis a Laax.

Beeli vesa pia stedi las duas varts sin il territori da Sagogn; da stad e d’enviern. Il territori tranter il Plaun (1560 m s.m.) ed il Vorab Pign ( 2897 m s.m.) è numnadamain en proprietad da la vischnanca burgaisa da Sagogn. Là sa chatta l’alp Son Martin ch’è uschia ina part dals runals e da las pistas dal territori da skis.

Ils da Sagogn profiteschan però er da las pendicularas. Per l’ina dals turists e per l’autra dad abunaments da skis pli favuraivels. Plinavant ston las pendicularas pajar tschains a la vischnanca.

Mo 100 meters dasper l’alp è il mument in plazzal da lavur, il runal da la Siala vegn remplazzà. Quai fetschia canera, na disturbia però betg grond il manaschi da l’alp di Gion Beeli. Els hajan dentant stuì metter dapli saivs per che las vatgas na giajan betg sin ils plazzals.

Ballas da silo enstagl char da fain

 

Ballas da silo spargnian il clavà e blera lavur, di Gion Beeli da Sagogn. Las ballas èn numnadamain resistentas a la chalira ed al fraid. Ins po pia laschar giuadora ellas stad ed enviern. Uschia fa Gion Beeli quasi mo pli ballas cun ses fain e metta nagut pli en clavà.

La surfatscha da prads da far fain vegnia adina pli gronda, cunquai ch’i dettia adina pli paucs purs, di Gion Beeli. Ils manaschis creschian pia, uschia ch’il singul pur n’haja gnanc plaz en clavà per tut il fain.

Insumma èn las ballas da silo pli praticas, pertge la blera lavur fa la maschina da ballas: ella rimna il fain, pressegia el, metta enturn ina rait e la fin finala il plastic clar-verd.

Problem dal plastic

E tar il plastic entschaiva era il problem da las ballas da silo: Mintga balla da silo è zugliada en in plastic che paisa circa 2 kilos. Dismetter il plastic sin moda convenziunala, q.v.d. brischar il plastic, n’è dentant betg bun per l’ambient.

Project da pilot

I dat dentant è la pussaivladad da reciclar la folia. In project da pilot persuenter è gia vegnì lantschà en il Grischun central. En Surselva n’èsi dentant anc betg uschè lunsch.